“ساعات الواحد بيكلم الحيطة”، عبارة قالتها سيدة الشاشة فاتن حمامة في الفيلم الشهير “دعاء الكروان” تعبيراً عن الإحساس بالوحدة وعدم وجود شخص جدير بالثقة نرمي همومنا على عتبته.
ولكن من اليوم يعدك موقع “قعدة هوانم” بأن يكون ملجأ آمن لمشاكلك وأسرارك وأن نسعى جاهدين لإيجاد حلول لتلك المشاكل بمساعدة باقي القارئات، حتى نصل في النهاية إلى بر الأمان الذي نطمح جميعنا إليه.
وتقول صاحبة مشكلة اليوم:
“كل البنات ابن الجيران بالنسبالها هو الولد الشقي اللي بتعيش معاه أحلى قصة حب ويعيشوا في نبات ونبات ويخلفوا صبيان وبنات إلا أنا ابن الجيران بالنسبالي هو كابوس حياتي.. للاسف احنا الاتنين عيلتنا قريبين جدا من بعض فالمقارنة بينا مبتنتهيش طول الوقت مقارنات ما بينا وللاسف هو اللي دايما بيفوز فيها”
“حتى لما كبرنا هو ارتبط ببنت صاحب الشركة الناشونال اللي شغال فيها اللي مفهاش غلطة وانا فشلت في الشغل والحب ولما جالي ابن الحلال كان انسان عادي بمعنى الكلمة الراجل الموظف اللي بيجي بعد الشغل شايل بطيخة ده ورغم أنه إنسان محترم وحنين بس فضلت غصب عني اقارن بينه وبين ابن الجيران اللي بيلبس بدل وعايش في كومباوند وراكب عربية آخر موديل”
“معرفتش ارضى بحياتي بسبب هوسي المريض بابن الجيران وجوزي لاحظ ده وللاسف في أي تجمع بين الأسرتين كانت عيني مبتتشلش من عليه وجوزي طبعا زي أي راجل محترم رفض يعيش معايا وطلقني ودلوقتي أنا ولا عارفة ارجع اعيش حياتي الهادية مع جوزي المحترم ابن الحلال ولا عمري هعيش مع ابن الجيران اللي سعيد مع مراته وعياله.. اعمل ايه”
الرد على صاحبة المشكلة:
“عزيزتي صاحبة مشكلتك مش في ابن الجيران مشكلتك أنك مش قنوعة كفاية عشان ترضي بحياتك ومش شجاعة برضوا كفاية أنك تغيري فيها بالقدر المتاح اللي ممكن يجمل شكل حياتك أنتي قررتي أنك تعلقي مخاوفك وفشلك على شماعة ابن الجيران ولاقيتي في المقارنة اللي كانت بتحصل بينكم زمان دافع لده”
“وفي الواقع انتي لو قربتي اكتر من حياة اين الجيران اللي انبهرتي بيها هتلاقي مشاكل كتير بس الفرق اللي بينك وبينه أنه قدر يخرج من الشرنقة اللي اتحبستوا فيها زمان وقدر يبني حياة جديدة ليه وكافح لحد ما حقق جزء من أحلامه ولسة بيكافح”
“اخرجي برا السجن اللي انتي حبستي نفسك فيه وابتدي من دلوقتي فكري ايه اللي انتي عايزاه وكافحي عشان توصليله وخلي لنفسك دايما أهداف جديدة عشان متحبطيش وترجعي لنقطة الصفر”
وبعد عرض المشكلة والرد عليها نرجو منكن عزيزاتي القارئات ألا تبخلن على صاحب المشكلة بكلمة دعم أو حلول أخرى للمشكلة من خلال التعليقات.
وفي انتظار مشاكلكم واسفساراتكم من خلال الايميل الرسمي للموقع 👇
قد يعجبك أيضاً
علاقة حبيبي المُريبة بأخته دمرتني
وأيضاً
