“ساعات الواحد بيكلم الحيطة”، عبارة قالتها سيدة الشاشة فاتن حمامة في الفيلم الشهير “دعاء الكروان” تعبيراً عن الإحساس بالوحدة وعدم وجود شخص جدير بالثقة نرمي همومنا على عتبته.
ولكن من اليوم يعدك موقع “قعدة هوانم” بأن يكون ملجأ آمن لمشاكلك وأسرارك وأن نسعى جاهدين لإيجاد حلول لتلك المشاكل بمساعدة باقي القارئات، حتى نصل في النهاية إلى بر الأمان الذي نطمح جميعنا إليه.
وتقول صاحبة مشكلة اليوم:
“من وأنا صغيرة ويوم عيد ميلادي بالنسبالي يوم مميز بستناه من السنة للسنة حتى لما كبرت والناس ابتدت تقولي تعليقات سخيفة من نوعية مش كبرنا على الحاجات دي بقى كنت بطنش التعليقات السخيفة دي وأتمسك بحبي الطفولي لعيد ميلادي”
“فضلت على الحالة دي لحد ما جوزي المحترم أداني أسخف هدية عيد ميلاد في التاريخ.. زي كل مرة كنت بحضر لعيد ميلادي لحد ما لاقيت لايف بالصدفة لواحدة ظاهر فيه جوزي معاه.. البيه كان مفهمها أنه سنجل وهي نزلت اللايف ده عشان تعلن خبر ارتباطهم لكل الفانز بتوعها ومن حسن السئ أني كنت فعلا واحدة من الفانز بتوعها.. نسيت اقولكم أنها فنانة مثلت كذا دور وده قهرني أكتر أني كنت بحب تمثيلها وبسببه بقيت بكرهها زي عيد ميلادي بالظبط”
“مقهرتنيش فكرة الخيانة أد ما قهرني أنه اختار يوم عيد ميلادي عشان يقابلها فيه في الوقت اللي أنا بخطط فيه هنقضي أزاي اليوم المميز ده مع بعض وبعد الحادثة دي بقيت بكره عيد ميلادي لأنه بيفكرني بخيانته ليا بس أنا اشتقت لنفسي زمان اشتقت للهفتي وأنا بستنى اليوم ده وكاره وجود جوزي ومش عارفة اتعامل ازاي”
الرد على صاحبة المشكلة:
“عزيزتي صاحبة المشكلة واضح جدا أنك عاطفية وبتتعلقي بالذكريات والأماكن والأشخاص وواضح جدا أنك مبتحبيش جوزك لأنك ببساطة زعلانة على حاجات كتير هو مش منها”
“جايز تكون دي أعظم هدية عيد ميلاد جاتلك من الكون عشان تعيشي حياتك صح وترتبي أولوياتك مينفعش تكملي حياتك مع شخص أنتي معتبراه ديكور بيكمل اللوحة الجميلة اللي في خيالك انتي بس أنتي كده بتظلميه وبتظلمي نفسك.. راجعي حياتك كلها ورتبي أولوياتك والحياة مبتقفش على أشخاص ولا أشياء انتي أهم من أي حاجة”
وبعد عرض المشكلة والرد عليها نرجو منكن عزيزاتي القارئات ألا تبخلن على صاحب المشكلة بكلمة دعم أو حلول أخرى للمشكلة من خلال التعليقات.
وفي انتظار مشاكلكم واسفساراتكم من خلال الايميل الرسمي للموقع 👇
qadithawanem@gmail.com
قد يعجبك أيضاً
وأيضاً
