“ساعات الواحد بيكلم الحيطة”، عبارة قالتها سيدة الشاشة فاتن حمامة في الفيلم الشهير “دعاء الكروان” تعبيراً عن الإحساس بالوحدة وعدم وجود شخص جدير بالثقة نرمي همومنا على عتبته.
ولكن من اليوم يعدك موقع “قعدة هوانم” بأن يكون ملجأ آمن لمشاكلك وأسرارك وأن نسعى جاهدين لإيجاد حلول لتلك المشاكل بمساعدة باقي القارئات، حتى نصل في النهاية إلى بر الأمان الذي نطمح جميعنا إليه.
وتقول صاحبة مشكلة اليوم:
“هو طبيعي أني لما أقابل شخص واتشدله الاقيه اتشدلي وألاحظ ده وكل اللي حواليا يلاحظوه وبعد فترة قصيرة الاقيه اتغير من ناحيتي وابتدى يبعد”
“أول مرة حصل كده مهتمتش وقلت مش مشكلة أكيد المشكلة فيه هو وواسيت نفسي بالطريقة دي وكملت حياتي وركزت في شغلي لحد ما ظهر شخص تاني ونفس السيناريو حصل واتكرر الموضوع مع التالت والرابع والعاشر ولحد دلوقتي مش فاهمة ايه العيب الخطير اللي فيا اللي بيخليهم يهربوا مني بالشكل ده وطبعا كرامتي مش هتسمحلي أني اروح اسألهم أو يمكن أنا أجبن من أني أسمع الأسباب ساعات كتير بفكر هو أنا بعبع”
“دلوقتي أنا اللي بقيت أهرب من أي حد أحس أنه ابتدى يهتم بيا عشان منجرحش لما يبعد بعد فترة بس المشكلة أن الكل بيغلطني وبيقولي أني بظلم نفسي وأني لازم أديلهم فرصة أنا كده صح ولا هما”
الرد على صاحبة المشكلة:
“عزيزتي صاحبة المشكلة مفيش أدنى شك أن اللي بتتعرضيله شئ مؤلم جدا وطبيعي أن أي حد في مكانك هيفكر أنه يهرب من الوضع ده بس اللي لازم تعرفيه أنك مش مضطرة تهربي عيشي حياتك بشكل طبيعي جدا وركزي في شغلك والإنسان الصح هيظهر في حياتك بدون أي مجهود منك ومهما حاولتي تهربي هتلاقي دايما القدر بيجمعكم تاني”
“المهم أنك متتسرعيش في قراراتك ومتخليش الحب هدف في حياتك حولي الحب لوسيلة وطاقة نور تخليكي تقدري تكملي حياتك واعرفي أنك لو معرفتيش تسعدي نفسك مفيش أي مخلوق ممكن يخليكي سعيدة اعملي الحاجات اللي بتسعدك وخليكي متأكدة أنك تستحقي كل الحب بس لسة الشخص الصح مجاش أوانه”
وبعد عرض المشكلة والرد عليها نرجو منكن عزيزاتي القارئات ألا تبخلن على صاحب المشكلة بكلمة دعم أو حلول أخرى للمشكلة من خلال التعليقات.
وفي انتظار مشاكلكم واسفساراتكم من خلال الايميل الرسمي للموقع 👇
قد يعجبك أيضاً
وأيضاً
