“ساعات الواحد بيكلم الحيطة”، عبارة قالتها سيدة الشاشة فاتن حمامة في الفيلم الشهير “دعاء الكروان” تعبيراً عن الإحساس بالوحدة وعدم وجود شخص جدير بالثقة نرمي همومنا على عتبته.
ولكن من اليوم يعدك موقع “قعدة هوانم” بأن يكون ملجأ آمن لمشاكلك وأسرارك وأن نسعى جاهدين لإيجاد حلول لتلك المشاكل بمساعدة باقي القارئات، حتى نصل في النهاية إلى بر الأمان الذي نطمح جميعنا إليه.
وتقول صاحبة مشكلة اليوم:
“أنا ست محظوظة بشهادة كل اللي حواليا قدرت أكون أسرة سعيدة مثالية زوج حنين أولاد ناجحة ومطيعة وفي مراكز مرموقة بس اللي الناس متعرفوش أن الفراغ هيموتني وأن تكرار الأيام والروتين اللي أنا عايشة فيه بيقتلني بالبطئ، لحد ما اكتشفت برنامج تعارف الأول دخلته من باب الفضول وكسر الروتين بس بعد كده بقيت مدمناه.
اتعرفت فيه على شاب وسيم لسانه حلو خطف قلبي وفضلت في حيرة بين التزامي ومبادئي وأسرتي وبين سحر البرنامج وحلاوة البدايات بيني وبين الشاب ده وللاسف ضعفت واتقابلنا كذا مرة وحصل بينا تجاوزات بس فضلت محافظة على شرفي وشرف جوزي على أد ما اقدر.
وفي يوم حزين جدا اتقدم لبنتي شاب بتحبه زميلها في الشغل ويشاء القدر أن هو يبقى نفس الشاب اللي بحبه وبينا علاقة عرفت أن ده عقاب ربنا ليا بس ذنب بنتي ايه هي بتحبه جدا وفي نظرها ونظر والدها هو عريس ميترفضش، مش عارفة اعمل ايه واقولهم ازاي حقيقة الشاب ده والكارثة أنه بيهددني لو موافقتش هيفضحني أدام عيلتي.
الرد على صاحبة المشكلة:
للاسف انتي ظلمتي عيلتك ونفسك لما استسلمتي لشيطانك ورضيتي تحطي نفسك في مكانة وضيعة بعد ما كنتي أم محترمة لعيلة كل الناس بتحلف بمثاليتها بس ده مش وقت الندم ده وقت أنك تبقي قوية وتواجهي الشاب ده وتمنعي الجوازة اللي هتبقى باب للشيطان أنه يدمر الأسرة الجميلة دي.
لازم تبينيله أنك مش خايفة منه وأنك ممكن تدمريله شغله ومستقبله لو فكر يجي جنب أسرتك ولو استمر على تهديده لازم تعترفي لجوزك عشان تنقذي بنتك لازم تدفعي تمن غلطتك في سبيل أن بنتك متقعش ضحية لشخص خاين ومستهتر هيدمر حياتها.
والأهم أنك تتوبي لربنا وتدعيه أنه ينقذك وينقذ عليتك وأنهم ميدفعوش تمن غلطتك دي.
وبعد عرض المشكلة والرد عليها نرجو منكن عزيزاتي القارئات ألا تبخلن على صاحبة المشكلة بكلمة دعم أو حلول أخرى للمشكلة من خلال التعليقات.
وفي انتظار مشاكلكم واسفساراتكم من خلال الايميل الرسمي للموقع 👇
قد يعجبك أيضاً
وأيضاً
