“ساعات الواحد بيكلم الحيطة”، عبارة قالتها سيدة الشاشة فاتن حمامة في الفيلم الشهير “دعاء الكروان” تعبيراً عن الإحساس بالوحدة وعدم وجود شخص جدير بالثقة نرمي همومنا على عتبته.
ولكن من اليوم يعدك موقع “قعدة هوانم” بأن يكون ملجأ آمن لمشاكلك وأسرارك وأن نسعى جاهدين لإيجاد حلول لتلك المشاكل بمساعدة باقي القارئات، حتى نصل في النهاية إلى بر الأمان الذي نطمح جميعنا إليه.
“مشكلتي بدأت لما حضرت فرح صاحبتي وهناك شفته وقلبي اتشدله بطريقة فظيعة وقلت هو ده العوض عن كل اللي فات وفعلاً لاحظت اهتمامه بيا طول الفرح وحصلت اللعنة اللي ساعتها كنت فاكراها معجزة واتقدملي بعدها بفترة.
في الأول كان حنين ولسانه حلو ففرحت واتعلقت بيه أكتر وأكتر لحد ما ابتدى يتغير فجأة بقى عصبي جداً على مواقف تافهة متستدعيش كل الغضب ده وعشان بحبه تجاهلت كل ده وكملت وقلت مع الوقت لما يتأكد من حبي وحناني هيتغير.
واتجوزنا واتحول بعدها لوحش حقيقي كل يوم ضرب وإهانة لحد ما اكتشفت بالصدفة أنه مدمن وأن ده تأثير خروج المخدر من جسمه لما الجرعة ببتأخر مبقتش مصدقة أن جوزي مدمن.
استحملت وفي اليوم اللي قررت اهرب من الجحيم ده اكتشفت اني حامل قلت هي دي معجزتي الحقيقية وأني خلاص هعيش حياتي لابني لحد ما جه اليوم الأسود اللي صحيت ملقتوش جنبي واكتشفت أن جوزي باعه عشان يسدد ديونه بسبب الزفت اللي بيشربه، الدنيا اسودت في عيني بقالي ٣ سنين بدور عليه مش لاقياه والمصيبة أني دلوقتي أم لبنتين غيره ومش قادرة أسيب جوزي ولا قادرة اعيش معاه.. اعمل ايه
للاسف الغلط من البداية أنكم اتسرعتم ومسألتوش كويس عن الشخص اللي متقدم ده ظروفه ايه وهل هو كفأ وهيتقي ربنا فيكي ولا لأ، بس للاسف الوقت فات على الندم وجه وقت أنك تاخدي خطوات جذرية للتخلص من لعنة حياتك دي.
بالنسبة لابنك المخطوف لا نملك سوى الدعاء أن ربنا يرده لحضنك كما رد سيدنا موسى لحضن والدته.
أما بالنسبة لجوزك فلازم تدوري على شغل وتقدري تصرفي على نفسك علشان تخلصي منه وتصرفي على بناتك اللي هيبقوا محتاجين ليكي أكتر من الأول لازم تبقي قوية وتقدري تقفي على رجليكي وربنا يقويكي.
وبعد عرض المشكلة والرد عليها نرجو منكن عزيزاتي القارئات ألا تبخلن على صاحبة المشكلة بكلمة دعم أو حلول أخرى للمشكلة من خلال التعليقات.
وفي انتظار مشاكلكم واسفساراتكم من خلال الايميل الرسمي للموقع 👇
قد يعجبك أيضاً
وأيضاً
