“ساعات الواحد بيكلم الحيطة”، عبارة قالتها سيدة الشاشة فاتن حمامة في الفيلم الشهير “دعاء الكروان” تعبيراً عن الإحساس بالوحدة وعدم وجود شخص جدير بالثقة نرمي همومنا على عتبته.
ولكن من اليوم يعدك موقع “قعدة هوانم” بأن يكون ملجأ آمن لمشاكلك وأسرارك وأن نسعى جاهدين لإيجاد حلول لتلك المشاكل بمساعدة باقي القارئات، حتى نصل في النهاية إلى بر الأمان الذي نطمح جميعنا إليه.
وتقول صاحبة مشكلة اليوم:
“أنا بحب خطيبي فوق ما أي حد ممكن يتصور حب مش طبيعي مستعدة أقضي عمري كله بس أدامه اتأمل في ملامحه واسمع صوته ورغم أن بداية تعارفنا كانت قعدة صالونات عادية جدا بس هو قدر بعد فترة قصيرة يكسب قلبي ويخليني أعشقه”
“كنا كويسين جدا أول تلات شهور كنت حاسة أني عايشة في الجنة وكنت بحسد نفسي عليه بس بعد كده اتحول بقى واحد تاني ممكن ميكلمنيش بالأيام ودايما مشغول وأنا كنت دايما بدورله على أعذار عشان مش متخيلة شكل حياتي من غيره”
“وفضل الوضع السخيف ده مستمر لحد ما في يوم كنت خارجة مع أصحابي ولاقيته أدامي ومعاه واحدة بيبصلها بمنتهى الحب اللي في الدنيا وقتها سمعت صوت قلبي بيتكسر وهو شافني اعتذرلي ووعدني أنها آخر مرة وأنها كانت مجرد نزوة”
“بعد الموقف ده رجع تاني لاهتمامه بيا ومعاملته اللي خلتني أقع في غرامه بس المرادي أنا مش قادرة أحبه ولا متقبلة وجوده بأي شكل وفي نفس الوقت لو بعد يوم كامل ابقى هتجنن من غيره مش عارفة اتصرف أزاي”
الرد على صاحبة المشكلة:
“عزيزتي صاحبة المشكلة أنا مقدرة جدا مشاعرك والخذلان والألم اللي حسيتي بيه بس اللي لاحظته طول رسالتك أنك مفيش عندك وسط في مشاعرك يا بتحبي أوي يا بتكرهي أوي وده عامة هيسببلك مشكلة في حياتك مش في علاقتك بالشخص ده بس”
“بالنسبة لعلاقتك بخطيبك صعب جدا ترجعي ثقتك بيه بعد ما شفتي بعينيكي خيانته ليكي هتفضلي دايما شاكة أنه بيخونك وده احساس هيخنقكم انتوا الاتنين”
“ادي لنفسك فرصة تختبري مشاعرك بيه هل فعلا هتقدري تسامحي وتغفري وترجعي ولا غيابه هيريحك بس الأهم أن سواء كملتي معاه أو مع غيره لازم تتحكمي في مشاعرك أكتر من كده خير الأمور الوسط يا عزيزتي”
وبعد عرض المشكلة والرد عليها نرجو منكن عزيزاتي القارئات ألا تبخلن على صاحب المشكلة بكلمة دعم أو حلول أخرى للمشكلة من خلال التعليقات.
وفي انتظار مشاكلكم واسفساراتكم من خلال الايميل الرسمي للموقع 👇
قد يعجبك أيضاً
وأيضاً
