“ساعات الواحد بيكلم الحيطة”، عبارة قالتها سيدة الشاشة فاتن حمامة في الفيلم الشهير “دعاء الكروان” تعبيراً عن الإحساس بالوحدة وعدم وجود شخص جدير بالثقة نرمي همومنا على عتبته.
ولكن من اليوم يعدك موقع “قعدة هوانم” بأن يكون ملجأ آمن لمشاكلك وأسرارك وأن نسعى جاهدين لإيجاد حلول لتلك المشاكل بمساعدة باقي القارئات، حتى نصل في النهاية إلى بر الأمان الذي نطمح جميعنا إليه.
وتقول صاحبة مشكلة اليوم:
“انا ست متجوزة من عشر سنين وعندي ولد وبنت هما كل حياتي في الأول كانت حياتي مستقرة أنا وجوزي مفيش بينا الحب الفظيع اللي بتحلم بيه كل الستات بس كان بينا الود والاحترام وده كان كفاية بالنسبالي بس للاسف استخسر فيا ده كمان بعد العشرة دي كلها.
اكتشفت من كام شهر أن جوزي بيخوني بالصدفة مكنش نفسي اعرف ولا سعيت لده بس للأسف حظي الوحش وقعني في الموقف ده بنتي شافت رسالة بعتتهاله حبيبته وجت قالتلي حسيت اني اتكسرت ادامها معرفتش ارد حذرتها أنها متعرفش باباها وانا وهي كاتمين الحسرة في قلوبنا وساكتين.
المشكلة أن الست دي ابتدت تظهر في حياتنا جوزي ابتدى يعزمها عندنا كتير وقالي أن ظروفها صعبة وأنه عاوز يقربنا من بعض عشان متحسش أنها لوحدها هما مش عارفين أن انا عارفة بس أنا كل ما بشوفهم بحس بنار في قلبي مش عارفة اتصرف ازاي أواجههم ولا اسكت واكتم السر ده جوايا.
عزيزتي صاحبة المشكلة:
مش من الحكمة أنك تواجهيهم بخيانتهم عشان أنتي بكده بتكسري حاجز الخوف اللي جواهم ناحيتك وممكن بمنتهى البجاحة يتصرفوا بحرية أدامك ولو مفيش عندك بديل أنك تسبيه مش هتقدري تتصرفي صح.
مترفضيش صداقتها بس في نفس الوقت متقربيش منها اتحججي بأي ظروف عشان تمنعيها من زيارة البيت وفي نفس الوقت دوري على شغل وأمني مستقبلك عشان مهما حاولتي هيفضل مرتبط بيها ولو سابها هيرتبط بواحدة تانية عشان هو إنسان ناقم على حياته ومش هيملى عينه إلا التراب للأسف
وبعد عرض المشكلة والرد عليها نرجو منكن عزيزاتي القارئات ألا تبخلن على صاحبة المشكلة بكلمة دعم أو حلول أخرى للمشكلة من خلال التعليقات.
وفي انتظار مشاكلكم واسفساراتكم من خلال الايميل الرسمي للموقع 👇
قد يعجبك أيضاً
وأيضاً
